تاریخ : پنج شنبه 89/2/30 ساعت: 10:14 صبح
بولود قاراچورلو 1305 ده مراغا شهرینده آنادان اولدو. دوغوم گونونده یاغیشین یاغماسی باعث اولدی آتاسی اونون آدینی (بولود) قویسون، اما پهلوی رژیمینین ثبت احوال اداره سی بو آدی -نامانوس!- بیلیب و اونون شناسنامه سین -بهلود- آدیله وئردیلر.او ایلک شعر تجروبه لرینی 24 – 25 اینجی ایلر ده تبریزده قورولان شاعیرلر مجلیسیندن باشلامیش او 25 اینجی ایلین 21 آذر فاجعه سیندن سونرا دوستاقلارا و بوغونتولارا معروض قالمیش بیر چوخ آذربایجانلی کیمی چارا سیز تهراندا یاشامیش.
بولود قاراچورلو پهلوی رژیمینین بوغونتوسوندا بوتون تورک دونیاسینین اؤلمز آبیده سی اولان دده قورقود کتابینین التی بویونو گونوموزون شعر دیلیله (سازیمین سؤزو) آدیندا قوشوب یایماغ ایله ایراندا یاساق اولموش تورک دیلینین گوجونو بیرداها اثبات ائدیب و آذربایجان میللتینه چیراغ کیمی یول گؤسته رن اولدو.
سهندین اثرلری پهلوی دؤورونون دیل و مدنییتیمیزه یاراتدیغی بوغونتولو گونلرین سولماز تابلولاریدیر او گونلری گؤرمه ینلر اوچون :
دوشونجه لریم یاساق ،
دویغولاریم یاساق ،
کئچمیشدن سؤز آچماغیم یاساق ،
گلجکدن دانیشماغیم یاساق ،
آتا و بابامین آدین چکمگیم یاساق ،
بیلیرسن ؟
آنادان دوغولاندا ، بئله ،
اؤزوم بیلمییه – بیلمییه ،
دیل آچیب ، دانیشدیغیم دیلده ،
دانیشماغیمدا ، یاساق ایمیش ، یاساق ،
سهندین شعرلرینده انسانلیق و بیرلیک دالغالانیر، اونون شعرلری وطن عشقی، آزادلیق، میللی حاقلار، سئوگی و… ترنم ائدیلیر.
سهند آنادیلینه و آذربایجانلی اولماغینا گوونیردی و بو دوشونجه دن دولایی پهلوی دؤورونده خوش بیرگون گؤرمه دی و دائما مامورلارین طرفیندن اذیت اولوب و نظر آلتیندا ساخلانیردی، اما اونون اینامی و اؤز وطنینه اولان عشقی بو باسقی لارا اوستون گلیب و اونلاری مایوس ائدیردی.
سهند 1346نجی ایلین بهمن آییندا شهریاری گؤرمک اوچون تهراندان تبریزه گلیر، آمما شهریار کی بو ایللر دونیادان ال اوزوب و اؤز ائویندن ائشیکه چیخمیردی سهندی گؤرمک ایستمیر . آمما شهریاری گؤرمک شوقی سهندی مجبور ائدیر اؤز آنا دیلینده شهریارا مکتوب شعرینی یازیب شهریارا گؤندرسین و بو مکتوب -سهندیه- اثرینین یارانماسینا باعث اولور.
بو آزادلیغا حسرت قالان دویغولو و دوشونجه لی شاعیر 1358 نجی ایلین فروردین آیینین22نده دونیادان گئدیر و اونون وطن عشقینه دویونن اورگی دؤیونمکدن دایانیر و بوتون حق سئون انسانلاری ماتمه بورویور.
آلتداکی شئعر بولودون نه قدر انسانلیغا و اؤز کیملیینه باغلیلیغین گؤستر مکده دیر :
دئمیرم اوستون نژاددانام من
دئمیرم ائللریم ائللردن باشدیر
منیم مسلکیمده ، منیم یولومدا
ملت لر هامیسی دوستدور قارداشدیر
نه دیلین، نه یوردون ،نه ده امگین
تحقیرائله میرم ،هدله میرم
کئچمیشین، ایندی سین ، یا گلجگین
من آییرمیرام، آیری سالمیرام
قارداشی قارداشدان ، آروادی ـ اردن
آنانی بالادان، اتی دیرناقدان
اوره گی ـ اوره کدن، قانادی پردن
اینسانلیق بیرلیگی ایدهآلیم دیر
قارداشلیق، یولداشلیق ، ادبی باریش
دونیادا ان بویوک آرزولاریمدیر
دیلیم وار،خالقیم وار،یوردوم - یووام وار
یئردن چیخمامیشام گوبه لک کیمی
آدامام،حاقیم وار،ائلیم-اوبام وار
هئچ کسه اولمارام ،نه قول،نه اسیر
قورتولوش عصریدیر اینسانا بو عصر
اسیر اولانلاردا بوخو ون کسیر
